"Verkin mín eru alls konar því lífið er alls konar! Ég fæ innblástur í náttúrunni og eru þá blóm og tré þar ofarlega á listanum. Ég hef að auki alltaf verið heilluð af því hvernig orð og myndir geta unnið saman.

Að skrifa og mála eru tjáningarform sem vega hvort annað upp.

Þegar ég nálgast nýtt verk hef ég sjaldan skýra hugmynd um hvað á að gerast. Þess í stað læt ég litina og formin leiða mig, hlusta á það sem málverkið vill segja og leyfi því að tala til mín á sínu einstaka tungumáli. Stundum eru myndirnar sem koma fram fullar af orku og lífi en stundum bera þær með sér mýkt og ró eins og þær hvísli leyndarmál sem aðeins gaumgæfasti áhorfandi getur fundið fyrir.

Á meðan ég vinn finn ég oft að ég dregst að ákveðnum orðum eða textabrotum sem virðast fanga kjarnann í því sem málverkið er að reyna að segja.

Ég skrifa þau niður í minnisbók og jafnvel inn í málverkið sjálft og leyfi þeim að síast inn í verkið og orkuna í kringum mig. Þegar málverkinu er lokið sest ég niður með dagbókina mína, horfi á verkið og byrja að skrifa út frá því sem kemur til mín. Ef það er texti eða skilaboð með myndinni kemur hann alltaf áreynslulaust til mín.

Hvert málverk segir sína sögu eða kemur með skilaboð og ef ekkert kemur til mín veit ég að litirnir og myndirnar vilja fá að standa ein og sér án texta.

Mjög oft skapa ég líka með ásetning um eitthvað sérstakt. Þá skrifa ég ásetninginn á strigann í byrjun og sé svo hvað vill koma. Þá er ég með ákveðna orku í huga og ég veit þá að sá sem einhverntíman mun fá verkið þarf einmmitt þá orku eða þann ásetning inn í líf sitt.

Mér finnst það svo fallegt hvernig verkin mín rata alltaf heim í rétta hjartað."

- Kristín Berta Guðnadóttir -